ملحوظة: التدوينة بالعامية السورية
لما كنت بفكر اطلع ع تركيا، أتخيل إني راح أوصل لإسطنبول وأنا هيك بتمشّى ومعي شنطايتي وثيابي مشقوقين، والدنيا مطر، وقاعد ع رصيف وبيدي سيكارة، وفجأة بيجي شخص بيقعد جنبي ويصير يحكيني ويستفسر عن وضعي، وبعدها بيقلي تعى اليوم ارتاح عنا، وبياخدنا وبيعشيني أحلى عشا عند الصوبيا هي يلي بيحطو فيها حطب، طبعاً بعد ما اتحمم وألبس أحلى بيجامة، وبيقلي نام وارتاح لبكرى، وبفيّق تاني يوم ع صوت العصافير والجو حلو، وتجي بنت هداك الزلمة تفيّقني ع الفطور وكون طالعلي عضلات فجأة وتحبني من نص نظرة، واقعد معون ع طاولة الأكل، ويصير الزلمة يترجاني أشتغل عندو وبشركاته، وأنا أعمل حالي مو مهتم للمصاري وهيك.
بعدها وافق، وبعد ما وافق بتجيه الجلطة للزلمة من الفرح، وهو بيموت يوصي بكل أملاكه وشركاته لإلي، ويخبر بنته أنو وصيته الوحيدة إنها تتزوجني، وهي تقبل كرمال أبوها، وصير أغنى واحد بتركيا، وشركاتي تربح كثير، مع أني مابعرف كيف! بس المهم تربح.. وهلا راح نام لأنو بكرا بدّي أنزل أبحث عن عمل قبل ماصير بالشارع لأني باقي للأجرة يومين، وبكرا بخبركم شو حلمت كمان.
سلام عليكم أيها القراء الأكارم:
كثير مما تراه في الدراما التركية ليس صحيحاً؛ فالعمل في تركيا ليس بالأمر السهل، وإليكم 30 نقطة كنصائح وتصحيح معتقدات:
1- اللغة التركية لا تشبه غيرها من اللغات، فهناك كلمات مشتركة مع العربية أو الإنكليزية، لكن ليس -كما تعتقد- فالتركية لغة ملصقات ولواحق، فكلمة واحد أحياناً تمثل الضمير والفعل والفاعل، وتختلف اللهجات في تركيا مثل الدول العربية بين المدن والأقاليم، وعند الحديث بطلاقة تختفي الكثير من الحروف في اللفظ الذي أساساً قد يمثل فيها حرف واحد ضمير، لكنها ليست صعبة فالأطفال السوريون في الصف الثاني الابتدائي يتحدثون بها بكل سهولة.
2- لا تخلي حدي يعملك من البحر طحينة ويقلك لازم تشتري بيت أو مزرعة مشان تطالع إقامة، الإقامة بتطلع بدون التملك.
3- إذا حدى قلك لقيتلك بيت بعيد عن خط الباص 500 متر ويبعتلك الموقع على الخريطة حط احتمال أنو يكون البيت على قمة بدك تنكتين بنزين لتوصل على البيت بعد ما تنزل من الباص.
4- ضروري يكون السكن والشغل والمواصلات ومدارس الولاد قريبين من بعض، ببعض المدن السيارة الشخصية بتسببلك إعاقة بالحركة؛ بسبب الازدحام غير أنو المحروقات غالي، طبعاً لا تتوقع تلاقي شغل بسهولة وتلاقي مدير الشركة عم يستقبلك من المطار، السوق التركي صعب.
5- الجو بتركيا فيه الفصول الأربعة، وببعض المدن بالشتاء بيصل ارتفاع الثلج حتى 80 متراً.
6- شنتة الخصر أو الإيد المتينة والملتصقة بك بحزام متين، من أساسيات الحياة وليست موضة، وخاصة في المدن المزدحمة.
7- الموبايل المتطور مع بطارية فوق 10 ألف فولت ومعرفة استخدام التطبيقات ليست مرهقة، تركيا كلها تطبيقات على الموبايل.
8- كل مدينة تقريباً لها كارت للمواصلات العامة، اقتناؤه ليس إجبارياً، إنما يخفف مصروف المواصلات، أنا معي 15 كارت مواصلات للمدن اللي رحت عليها.
9- لما بدك تجي تركيا اعمل حسابك أنو كل مدينة ولاية وحدها؛ وبالتالي الانتقال من ولاية لأخرى كأنك عم تنتقل من أول وجديد، واذا طلعت إقامة بمدينة رح تضطر بكتير من الأحوال تنقل الإقامة على الولاية الأخرى أو المدينة التي ستعمل بها.
10- الشيء المشترك بين المدن التركية: اللغة التركية – النقود – شركات الاتصال – ساحة أتاتورك – حي جمهوريات – مول البيم. هدول بتلاقيهم بكل ولاية.
11- رئيس البلدية والوالي بتركيا يتمتعون بصلاحيات وزراء في مدنهم، مو متل الدول العربية، ونصف الشعب التركي بالضبط مع حزب العدالة والتنمية والنصف الثاني مع الأحزاب الأخرى، يعني إذا شفت اثنين أتراك خلي ببالك واحد مع حزب أردوغان والثاني مع الأحزاب الأخرى.
12- إذا بتعرف إسطنبول والسلطان أحمد وتقسيم والتوب كابي، بس تجي لتستقر بتشوف الوجه الآخر لإسطنبول تحت الأرض بساعات الذروة كيف الناس صفوف بانتظار المترو حتى ما تتأخر على شغلها.. هون المرأة والرجل بيشتغلوا وفي مساواة بين الجنسين، وأصلاً بتركيا العائلة كلها بتشتغل ليقدروا يعيشوا، يعني الصبح بتشوف سيول بشرية خاصة بإسطنبول، بس المواطن التركي شبعان والدولة أخذت على عاتقها تأمين مستقبله وحياته.
13- المياه الخاصة بالشرب مدفوعة الأجر تقريباً كل 10 لتر بدولار، وباقة الاتصالات إنترنت ومكالمات ورسائل بـ10 دولار شهرياً.
14- في المدن الكبرى، قد تركب المواصلات يومياً لمدة 5 ساعات، لاقي شي يشغلك بها الوقت؛ لأن كتير أحيانا رح تكون راكب بالمواصلات على الواقف.
15- القانون التركي مأخوذ من القانون اللاتيني، أرطغرل هون ما بتلاقي، وحتى التركي يوكّل محامي بكل شيء؛ لأن القوانين عندن معقدة ومتبدلة، ما تصدق حدي يقلك أنا بعرف كلشي بالقانون التركي.
16- كتير بيحترمه الأتراك الأشكال القانونية للجاليات متل المنظمات أو الجمعيات التي تمثل جالية، وهاد أريح للجالية طبعاً، بس العرب يحبون الغروبات كتير، والكل بدو يصير أدمن، وجرى سحب الفكرة على المنظمات على أرض الواقع.
17- بتركيا بتلاقي كل شي، يعني في بكل مدينة في الجامع والكنيسة والملهى وبيوت الدعارة ومحلات لعب القمار، وممكن تنسرق إذا ما منتبه لغراضك، والشي الأكيد أنك بكل وقت صلاة بتلاقي موضا ومصلى إذا بتحافظ على صلواتك.
18- هون البلد ماشي بالكمسيون، يعني الباص أو السائق إذا استقبلك من المطار وأخذك على فندق أو مطعم بياخد كمسيون من الفعالية التجارية، لا تستغرب بس تعيش شوي بتعرف ليش عم يعمل هيك.
19- البلد كبيرة، والمشوار بإسطنبول ممكن ياخد منك أربع ساعات بالمواصلات العامة وست ساعات بالسيارة الخاصة، إذا حدي ما خدمك ما تعتبرها قلة أصل، المسافات بعيدة.
20- أسرع شي بتركيا فتح الشركة، يعني خلال أسبوع بترخص شركة وبتصير كيان قانوني قائم بذاته، وإذا محتار وين الشركة بدك تفتحها، استشير منيح، فلكل مدينة خصوصية تجارية، فالفجل والبقدونس مختصة فيها مدينة العثمانية، والفليفلة الحمراء بأورفة، ومواد الصابون بنزب، ونصف سجاد العالم يخرج من غازي عنتاب، والجنسية قانونياً ليست بالأمر السهل إلا إذا شملك شي استثنائي.
21- المرأة التركية بعد سنة طلاق تسجل نفسها (بكر) والحب أساس الزواج، يعني بمعظم الحالات إذا الشب أو البنت التركية ما وجدوا من يحب فلا يتزوج، وإذا تزوج الرجل بأخرى فعند الدولة لا يعترف إلا على الزواج الأول، الثانية ليس لها شيء من إرث أو ما شابه.
22- العمل بالمجال الطبي صعب ومعقد ويتطلب شروطاً خاصة، والصيدلة والحقوق والقبالة والسيكيوريتي لأبناء البلد فقط، يعني إذا مهنتك من هدول فكّر بتغيير المصلحة.
23- هون الدولة بتشجعك على التصدير وبتحصل على تسهيلات لترخيص شركات التصدير، أما الاستيراد لداخل تركيا والإنتاج الشبيه بما لدى الأتراك فهو انتحار مهني.
24- البيع والشراء عبر الإنترنت شائع جداً، بس لازمه لغة وبيختصر عليك شغل كتير.
25- إذا اشتغلت بالتصدير من تركيا فلازم تكون بلبل بالتسويق عبر الإنترنت، الموضوع مو موضوع رخصة ومكتب ولافتة، في من هالشكل ملايين من الأتراك والجاليات العربية، كلمة السر بالتسويق عبر الإنترنت للوصول إلى أسواق جديدة وتصريف البضائع.
26- باقة الإنترنت وبطاقة مواصلات إضافية وبطارية الشحن أهم من الأكل والشرب، وخاصة بإسطنبول، وإذا أنت بإسطنبول شفت شخص لابس كندرة كل فردة بشكل ولون، لا تنتقد ممكن تكون موديل وأنتم وداري.
27- مكاتب النصب كثيرة، ولا تصدق حدي يقلك أنا بعرف كلشي بتركيا؛ لأن هاد شي مستحيل، حتى التركي لما بيدرس بجامعة بغير مدينته بضل أشهر مقلوب قاعه.
28- الجامعات التركية صار إلها ترتيب عالمي، فهي تصدر علم والمستهلك عم يجي يستهلك البضاعة على الأرض، والسوريين قاموا بتعريب تركيا على الإنترنت، وصار في غروبات بتشرح طريقة الوصول إلى الجامعات التركية وباللغة العربية.
29- كل فرد لازمه 250 دولاراً شهرياً لعائلة بين 4 إلى 6 أشخاص، بدون مفاجآت أو تكاليف استصدار الأوراق الرسمية أو لادات أو الأمراض أو رسوم المدرسة.
30- لا تتحدث بصوت عالٍ، وشبكة العلاقات مهمة، وخاصة لمن سيعمل بالتجارة، وإذا كنت عزباً فتزوج وإذا كنت متزوج فاستعن بالله ولا تعجز، وتأقلم مع كلمة (سيستم يوك)، يعني رجع بكراً لتكمل معاملتك؛ لأن السيستم واقف.
ملحوظة:
التدوينات المنشورة في مدونات هاف بوست لا تعبر عن وجهة نظر فريق تحرير الموقع.
