ملحوظة: التدوينة بالعامية المصرية
بص يا سيد الناس، حضرتك كزوج مش عارف تفك شفرة مراتك – زي ملايين الأزواج ما فشلوا ف كده عادي – هيبقى اهتمامك، على الأقل، إنك تفهم فشلت ليه..
هحاول أقول لك ليه..فيه مجموعة حقائق حضرتك فاكر نفسك عارفها وفاهمها.. لكن الواقع إنك مش عارفها ولا فاهمها زي ما انت متخيل.. ركز معايا.
*حقيقة رقم واحد:
فيه معلومة بيولوجية سيادتك أخدتها باستخفاف وسطحية جديرة بالعقاب..
الحقيقة دي إن الستات مختلفين عنك تماماً.. مختلفين لدرجة تكاد تخليهم species تاني غيرك كراجل.. وأنت بمنتهى عدم الإدراك والاستهتار المُشين بتتعامل معاهم بتلقائية وبراءة زي ما بتتعامل مع إسلام ومعتز وكريم.
*حقيقة رقم اتنين:
في 3 أوقات في حياة الست بيتمحور حواليهم جزء كبير من حياتها.. والـ 3 أوقات دول لازم تذاكرهم كويس عشان مصلحتك وصحتك وفلوسك وعيالك.
الوقت الأول:
وقت التبويض.. وده بيكون في الـ4 أو 5 أيام اللي في منتصف الدورة الهرمونية للست.
حاول ما تشوفش التبويض شيء بيولوجي بحت؛ لأنه فيه جزء كبير نفسي.
وقت التبويض بيكون جسم الست مليان إستروجين وبروجيستيرون.. ودول هرمونات الأنوثة اللي بينعنشوا دواخلها النفسية جداً..
وقت التبويض هو وقت مائل للسعادة عند معظم الستات.. هو ده الوقت اللي تضرب فيه ضربتك.. تطلب حلة محشي.. تطلب منها تشتري هدية وتزور أمك.. تطلب منها تسلفك 1000 جنيه مثلاً.. تطلب منها تخرج مع أصحابك وتسهر معاهم في الويك إند.. أو حتى تطلب منها تسيبك just to be.. انت واحتياجاتك بقى.
وقت التبويض شحيح وآخره كام يوم.. بلاش لكاعة وحاول تنجز في طلباتك قبل ما الدنيا تغيم عليك.
الوقت الثاني:
وقت الـ PMS المخيف!!
وده بييجي بعد وقت التبويض بكام يوم..
الـ PMS دي اختصار Premenstrual Syndrome.. وترجمتها: (أعراض ما قبل الطمث)….
لأسباب طبية غير معروفة بالظبط إلى الآن (بس ليها علاقة بنقص الأستروجين والبروجيستيرون)، الستات ف التوقيت ده بتبقى قرفانة من نفسها ومن حياتها ومن الدنيا والعيشة والناس والأبعاد الأربعة والأكوان الموازية.. هرموناتها بتبقى عاملة معاها الصح.. بيكون الإستروجين والبرجيستيرون بدأوا يقلوا ف جسمها وتلاقيها عاملة زي الكمبيوتر لما توصل فيه فلاشة متفيرسة..
أنت كزوج متزوج حديثاً هتتخض يا عيني..وهتلاقي حاجات غريبة بتحصل وانت بتحدق فيها فاغراً فاك في دهشة وذهول..
أمثلة للحاجات الغريبة: فجأة هتلاقيها بتتلكك على أي حاجة عشان تتخانق أوي وتزعق.. وفجأة هتسكت وتكتئب!
وبعدين تلاقيها تنحت شوية وتحس إنها فصلت من الوعي الحياتي.. وفجأة بخ!، تفتح في العياط!
بعد شوية تلاقيها مشيت زي الزومبي للتلاجة وهجمت على أي حاجة مسكرة أوي أو أي حاجة حادقة أوي، حسب توجهاتها ف الحياة..
ما تحاولش تفهم فيه إيه ولا تسألها ولا تتكلم جنبها بصوت عالي ولا تفتح معاها أي مواضيع..
حاول تاكل عيش وتربي العيال وانت ساكت.. أي محاولات رخامة أو استنطاع أو استفزاز، ممكن جدا ترشق فيك سكينة وانت نايم..
والحالة دي بتستمر أد إيه؟
بتستمر أسبوع أو 10 أيام كده لحد ما هرمون لطيف أوي اوى اسمه FSH يرجع يندع ف دماغها تاني ويحفز الإستروجين والبروجيستيرون إنهم يسأسأوا ف دمها.
التوقيت التالت:
ده توقيت الطمث اللي كلنا عارفينه.. مش هتكلم عنه كتير.. بص هنصحك نصيحتين..
-إملا التلاجة آيس كريم وشوكولاته وبيتزا ومخللات وكيتوفان وبروفين وكتافاست وحقنتين فولتارين 100مجم احتياطي.. ما تستخسرش الفلوس وما تسترخصش.. الفلوس اللي هتستثمرها ف الحاجات دي ممكن تنقذك من بلاوي..
-خليك جنبها بس من غير زن وطلبات.. إديها إحساس إنك متواجد ارسم على وشك ابتسامة حاول إنها تبان صادقة.. طبطب عليها كتيييييييير.. احضنها على أد ما ربنا يقدرك.. أول يوم في الطمث حاول تشتري أكل من برة عشان ما تخليهاش تطبخ.. ده بردو استثمار هينفعك جداً..
ها؟ استوعبت الحقائق اللي فوق دي كويس؟
تعال بقى أعرفك شوية من احتياجات "معظم" الستات..
الاحتياجات النسوية:
1- النساء تتغذى وتقتات على الإحساس بالأمان..
هتحس معاك بالأمان إزاي؟
إنها بصفة عامة تكون مقتنعة إنك بتحبها وبتخاف عليها..
طب تقنعها إزاي بالموضوع ده؟
فيه طريقة سهلة، إنك تكون بتحبها وبتخاف عليها فعلاً، وفيه طريقة صعبة شوية ومحتاجة مهارة لو مش بتحبها للدرجة يعني.. إيه هي الطريقة دي؟
عادي خاف عليها عن طريق القليل من الغيرة الحميدة والقليل من الأسئلة عن صحتها يومها مع قليل من كلمة "بحبك" بشوية إحساس هتؤدي الغرض بنجاح..
هتقول لي ما هي هتحس إني بمثل وبتاع؟
هقول لك عادي نسبة كبيرة من الزوجات بتكون عارفة إن جوزها بيمثل وتقنع نفسها إنه صادق وهتحس بالأمان وتتبسط بردو ما يهمكش..
2- النساء تتغذى وتقتات وتنتعش على الاهتمام النوعي اللصيق والمتتابع..
يعني إيه نوعي؟
يعني مش نفس التصرفات وطريقة الاهتمام اللي عملتهم مع هدير وفرحتها، بالضرورة لو عملتهم مع نهال هتفرح..
أينعم هدير ونهال كـ Concept بيحبوا الاهتمام، بس كل واحدة فيهم ليها مفتاح وطريقة..
استخدم غريزة الصياد جواك عشان تعرف مفتاح مراتك إيه وتستخدمه بذكاء..
3- الزوجات بيحبوا التلامس البريء أكتر من التلامس غير البريء اللي انت بتحبه للأسف..
الزوجة – لسبب غير معروف – تحب أوي إنك تحضنها من غير ما تكون عايز حاجة عيب.. الحضن البريء بالنسبة لها شيء أسطوري.. آل إيه عشان بيحسسها إنك بتحب روحها وكينونتها مش جسمها بس..
ملحوظة: مش لازم حضرتك كزوج تستنى لما "تحس" إنك نفسك تحضنها.. لأنك غالباً مش هتحس..
عشان أوضحلك أهمية الموضوع: حب الستات للحضن يقترب قليلًا من حب الرجالة للحاجات التانية..
4-الزوجة تحب أوي الزوج اللي يهتم بالعيال كأب.. هي بغريزتها كأم لما تلاقيك مهتم بالعيال بتفرح عشان هي من جواها – لا شعورياً – معتبراهم بتوعها لوحدها وإن انت مجرد آلة تلقيح مش أكتر.. وبالتالي زي ما تقول إنها بتشيل جميلك فوق راسها يعني..
5- الزوجة – لا شعورياً – تحب الراجل اللي يصرف عليها… يارب يكون هيصرف عليها 10000 جنيه بس..
لو متجوز واحدة بتشارك في مصروف البيت وبتتعامل معاك عادي في نفس الوقت، احتفظ بيها لأنها كائن أسطوري مجنح لازم تشيله على كفوف الراحة.. الحياة صعبة كلنا عارفين.. بس حاول بقدر الإمكان تسيب لها فلوسها من غير ماتكون كائن طفيلي يتغذى على لحمها واصرف عليها وشبرقها.. ربنا هيعوضك والله..
6- الزوجة لازم لازم لازم تحس إنها أنثى جميلة ومحبوبة ومرغوبة.. لو حضرتك ما كنتش المصدر اللي يحسسها بكده، غالباً هيحصل حاجة من اتنين:
-هتجف تذبل وتنطوي وتتحول تدريجياً إلى جثة منزوعة الدماء متساقطة الشعر..
أو
-هيجي واحد رقيع صايع هيحسسها الإحساس ده وهتضعف معاه..
7- كل زوجة هي مشروع أم إلى أن تلد..
طب نستفيد من المعلومة دي إزاي؟
حاول تشبع جواها غريزة الأمومة من ناحيتك..
حسسها إنك محتاج "تفضفض" معاها عشان مش بترتاح غير معاها هي وبس..
حسسها إنك بتحب تاكل من إيديها حتى لو الشيف الشربيني بنفسه هو اللي اترجاك عشان يطبخ لك بنفسه..
حسسها إن هدومك تحرم عليك لو مش هي اللي غسلتها وكوتها بإيديها الحلوين..
حسسها إنك تضيع من غيرها في غياهب الحياة والكون..
لو انت من نفسك بمعجزة ما بتحس الحاجات دي مع مراتك يبقى خير وبركة..
طب لو ما بتحسهاش؟؟
عادي، هو انا بطلب منك تحسها انت؟؟
أنا بطلب منك تحسسها هي بكده..
الزوجة ممكن تكون قطة شيرازي تستمد حياتها من التمسح فيك وتسيبك تزقطط مع أصحابك وتعيش ف الـ Comfort Zone بتاعتك في سلام، وممكن تكون أفعى أناكوندا شرسة تبلعك مع شوية عصير عشان تضمن إنك موجود معاها علطول..
الموضوع في إيدك تماما يا برنس..
ملحوظة:
التدوينات المنشورة في مدونات هافينغتون بوست لا تعبر عن وجهة نظر فريق تحرير الموقع.
