في تعريف سريع لمعنى كلمة "فوبيا" : هو مرض نفسي يعرف بأنه "خوف" متواصل من مواقف أو نشاطات معينة عند حدوثها أو مجرد التفكير فيها.
كل أما الواحد بيكبر بيكتشف "فوبيا" في حياته؛ يعني أنا مثلًا بخاف من الأماكن المرتفعة وبخاف من الأماكن الضيقة وبخاف من الحشرات..
وعندي الفوبيا بتاعه ليوناردو دي كابريو في فيلم The Aviator اللي كان بيقعد يغسل إيديه بهيستريا بس أنا لِسَّه ما اتجننتش -على وشك اقترب اقترب!
مع الوقت كلنا بنكتشف فوبيا شكل في حياتنا..
مع الوقت بنكتشف مخاوف اتزرعت جوانا وكبرت في عقولنا لدرجة يتحول فيها الخوف إلى إيمان!
في لحظة معينة كان حد بيسألني "هو انتي بتخافي من ايه ؟" لاقتني برص الحاجات دي كلها وفي كام طقطوقة تانيه جنبهم..
وكأن ساعتها كنت بسمعني لاقتني طول ما أنا قاعدة بكرر كلمة "خايفة" "بخاف من… " !
اكتشفت إني عايشة في خوف مستمر.. فوبيا مستمرة من الحياة كلها مش بس مكان مقفول ولا ضيق..
فوبيا من بكرة وما يحمله من احتمالات مش على هوايا..
فوبيا الخسارة..
فوبيا الفراق والعلم إنك مهما حبيت ومهما اتعلقت هتفترق..
فوبيا النجاح والخوف من "طب وَيَا ترى هعرف أكمل؟"..
فوبيا الحب "ممكن ألاقي اللي يحبني بجد طب ولو لاقيته هيحبني زي ما أنا ولا هيبقى عايزني اتغير طب ولو قالي اتغير هتغير ولا لا"..
وأنواع فوبيا كتير خلتني أحس إني بقيت
"ملكة الفوبيا"..
اكتشفت إني بخسر حياتي في الخوف المطلق..
خوف من الحياة منعني من إني أعيش الحياة..
من الاستمتاع بكل ما فيها من مساوئ قبل حتى الحسنات!
"خوف خلانا واحنا مغمضين بنشوف"..
ساعتها حسّيت إن عمري بيضيع إني لازم أعمل حاجة أسيطر بيها على مخاوفي وعشان كده أخدت عهد على نفسي إني لو هاتعلم حاجة من "خوفي" هتكون إني أكون أشجع، إني أعيش لحظة في الحياة وأنا بضحك من قلبي من غير ما أفكر في نهايتها لأنها ببساطة ممكن تتعوضش..
إني أطلع البرج وأقرب من السور وأستمتع باللحظة حتى وإن كان جوايا "شعرة" خوف..
اتعلمت أحلم وأنا متأكدة إن الحاجة الوحيدة اللي ممكن تخلي حلمي مستحيل هي الخوف!
