هذه التدوينة بالعامية المصرية
بعيداً عن الإقبال الضعيف في الانتخابات البرلمانية، وبعيداً عن غرق محافظة الإسكندرية، ونبعد شويه عن موت ريهام سعيد إعلامياً وبعيداً عن حادثة
الطائرة الروسية، وبعتذر إننا نبعد عن فوز أحمد مرتضى منصور في الانتخابات، وبعديها بيومين أبوه يتمنع من الظهور إعلامياً ونيجي لفكرة إزاي نقدر نقنع الشعب المصري إن يوم الجمعة مكانه الأصلي يوم الاثنين .
قبل الإجابة عن سؤال هل يجوز ترحيل يوم الجمعة مكان يوم الاثنين، نحاول نلاقي الطريقة المناسبة لإقناع الناس بحقيقة الموضوع، والبداية طبيعي هتكون عن طريق الإعلام، نتفق مع عدد من الشيوخ ونقنعهم بالطرق المعروفة مسبقاً ويكون الاتفاق على الظهور في جميع شاشات التليفزيون والراديو والبدء في نشر الفكرة، طبيعي إحنا كشعب يعشق المواضيع اللي ملهاش أي ستين لازمة، تلاقي ناس مقتنعة اقتناعاً كاملاً مكملاً بالقضية وإن من حقنا وطبقاً لسياسة التجديد فلازم نجدد في أيام الأسبوع ونخلي يوم الجمعة مكان يوم الإثنين، وعلى الناحية الأخرى تلاقي الفئة المعارضة بالإضافة للفئة اللي بتشتم بس وهي مش فاهمة حاجة، بس طالما الموضوع ضد فكرها .
بعد نشر الفكرة عن طريق وسائل الإعلام المختلفة وهنا أحب أستغل الفرصة وأشكر برامج التوك شو الأعلى مشاهدة في مصر، لإنها أعطت لنا هذه الفرصة الرائعة لنشر فكرة جديدة، ولحد هنا وكفاية لأحسن اتهم بازدراء الأديان .
إيه الهبل اللي إنت كاتبه ده؟!
سؤال طبيعي هيجي على بال أي حد قرر أن يكمل قراءة، ولكن قبل ما تسألني عن الهبل اسأل الناس عن القضايا اللي أصبحت حديث الرأي العام خلال الفترة الحالية، الدنيا تقوم على مذيعة قررت تفضح واحدة اتعرضت للتحرش في مول، في حين أن البنات في مصر كل يوم بيتعرضوا للتحرش، واسأل عن ترتيب دولتنا في قائمة الدول الأكثر عرضة للتحرش بداخلها، بس اشمعني دلوقتي وليه الناس مطالبوش بتوقيف المذيعة اللي تخدع الناس وتروح تتفق مع دجال كان عضو في الحزب الوطني المنحل وتقنع الناس إنه دجال أو شيخ وبيفك أعمال سفلية؟!
إحنا اللي عملنا ريهام سعيد لما قررنا نتفرج عليها ونتابعها في كل حلقة ونسلمها عقلنا، إحنا اللي إدينا الأعلام الفرصة إنه يتعايش معانا على إننا بدون عقل وبنجري دايماً ورا الأخبار المثيرة اللي مستحيل عقل يصدقها، إحنا اللي زمان كنا بنشتري الجرائد اللي كان معظم عناوينها خرافات، أفتكر من 13 سنة كان في جريدة العنوان الرئيسي فيها "ظهور المهدي المنظر في المنوفية"، أي نعم عرفت ليه دلوقتي انه ظهر في المنوفية بالتحديد، ولكن عنوان شبه ده كان الأقوى في زيادة المبيعات، ده غير أخبار الحوادث القتل والاغتصاب والسرقة اللي كانت موجودة من كام سنة وكان في جرائد تشتغل عليها.
نسيتوا إن من أهم برامج التليفزيون المصري من فترة مش بعيدة كان اسمه (خلف الأسوار) وكان حاصل على نسبة مشاهدة عالية، أي نعم برده كنت بخاف وأنا بتفرج عليه، ولكن كان الجمهور بيحبه .
الفكرة مش في ريهام سعيد أو برنامج صبايا الخير، في أكتر من ريهام سعيد بدأوا يظهروا على الساحة، الفكرة في الجمهور اللي بيصدق اللي بيجري ورا النوع ده من الأحداث اللي مش عاوز يقتنع أنه هو المسيطر على كل شيء، أخيراً وليس آخراً أنصحك بأنك متحاولش تفكر في العنوان .
ملحوظة:
التدوينات المنشورة في مدونات هافينغتون بوست لا تعبر عن وجهة نظر فريق تحرير الموقع.
