شارك الفنان أحمد مكي متابعي صفحته الرسمية على فيسبوك بنسخة كرتونية من أغنية "أغلى من الياقوت".
الأغنية الكرتونية من إخراج أحمد مجدي، وجاوزت 111 ألف مشاهدة عبر فيسبوك.
شكرًا على المجهود وتسلم ايديكم ❤❤❤
Gepostet von Ahmed Mekky am Mittwoch, 24. Oktober 2018
كان مكي قد أطلق أغنية "أغلى من الياقوت" في 18 سبتمبر/أيلول 2018، على قناة Mekky Music على يوتيوب، وجاوز عدد مشاهداتها 13 مليوناً حتى اليوم.
أغنية "أغلى من الياقوت" كانت معبِّرة وقريبة من الآباء لدرجة تجاوزها 1.5 مليون مشاهدة على قناته الرسمية على يوتيوب في 24 ساعة، بعدما حازت أكثر من ربع مليون مشاهدة بعد أقل من ساعة من طرحها.
الأغنية من كلمات وغناء وإخراج مكي نفسه، وألحان شادي السعيد، ومدير التصوير أحمد يوسف، ومدير الإنتاج حازم سليمان، بينما قام بهندسة المناظر الفنان حمدي عبدالرحمن.
الأغنية صُوِّرت في الفيوم وسط مناظر طبيعية في صحراء الفيوم وكذلك بحيرة قارون.
بساطة الأغنية وكلماتها المعبرة أثارت إعجاب رواد الشبكات الاجتماعية، خاصة الشباب بين سن 20 و35 من حديثي الزواج والأبوّة، ونشروا مشاعرهم عن الأغنية عبر هاشتاغ يحمل اسم مكي.
اقرأ أيضاً
وإليك كلمات الأغنية:
يوم ميلادك
يوم ما للدنيا إنت جيت
أول علاقتي بيك صوتك ما بيني وبينك حيط .
سمعت صوتك استغربت اتلخبطت اتشديت
قلبي اتنفض ما بين ضلوعي و م الفرحة بكيت.
أول ما شفتك الدنيا لفت بيا
ربي حبني ووهب ليا من عنده هدية
سرحت فيك ساعات
فيك مني كتير حاجات
يا رب تاخد مني بس الحلو في الصفات
وفي وسط زحمة فرحتي فجأة هجم سكات
مخلوط صور أبيض في أسود من إلى عشته ومن إلى فات
يمكن عشان الضلمة في طفولتي كانت أكتر من نور
عيل صغير قال بسم الله وقام يعدي في بجور
مش شايف شط أو ميناء لآخر البصر مافيش أمل
كان نفسي في حد يعلمني وينصحني ويبقالي المثل
ربك حماني واتولاني برحمته مافيش جدل
بعد ما كل سكة اتسدت واسودت والباب قفل
يا رب يا كريم اهديني وقويني ووفقني لسكة تربيته على الشيء السليم
عارف إني مش مثالي بس طمعان في كرمك تخلي حاله أحسن من حالي
وأنا أوعدك يا رب هحاول أبقى أحسن أب
وأديه إلى ما شفته في نهر طفولتي إلى نضب
كل يوم بيعدي وأشوفك فيه بتكبر يتفاجئ، إن صفاتي بتظهر فيك أكتر وأكتر
ابتسامتي وضحكتي والمشي وحتى تكشيرتي
حتى نومتك رجل فوق رجل دي نسخة من نومتي
قبل وجودك الدنيا ما كانتش فارقة معايا
قلبي ده كان خلاص قلب حجر دي مش كناية
جلدي تخن من قسوة الدنيا ومُر الحكاية
بقيت زعلان على الشخص إلى شايفه في المراية
لحد ما إنت جيت غيرتني وكنت الهداية
فتحت بإيدك كل أبواب الرحمة جوايا
لما بحضنك وأحس دقة قلبي جنب قلبك
مية في المية ما حبتش في الدنيا قبلك
لما بحضر أول مرة ليك في أي حاجة
قلبي بيرفرف وأحس بألف حاجة وحاجة
إحساس غريب جزء مني اتحول إنسان
بيزعل وبيفرح وبيزرع جوايا الحنان
خايف عليك من الدنيا يا ابني مالهاش أمان
وبدعي ربنا يحميك ويصونك هو الرحمن
كتبت رسالة ليك عشان لو قدري وقته حان
ومش مكتوب ليا أكون جنبك لآخر الامتحان
عاوزك تكون صاحب عزيمة فولاذ حديد
مهما الدنيا تحبطك صمم خليك عنيد
خليك واثق في نفسك عن حلمك إياك تحيد
مهما اسود الليل وطال هيطلع فجر جديد
عاوزك لربك شاكر وجهد الناس تقدر
وإوعى تظلم مهما كنت قادر، ربك أقدر
إوعى تفضح عيب إنسان لو ربك ستر
كما تدين تدان ما تضمنشي القدر
لو قلت كلمة حق والناس قامت عليك
كأنهم قالولك مبروك تسلم إيديك
عشان الكلب الميت ضربه مش مطلوب
لكن لو كان شجر مثمر بيتحدف بالطوب
لو يوم ذنوبك تقلت ارجع لربك توب
ربك لو حبك هيحبب فيك كل القلوب
ساعات بسرح وبسأل نفسي والدماغ تفكر
يا ترى حتبقى فعلاً ضهري لما أكبر
لما العجز يبدأ ينهش فيا ويجور عليا
في عز إحساسي بضعفي هيكون قلبك عليا
لما اللسان يتقل والكلام يصبح بطيء
وأعيد نفس الكلام أكتر من مرة أرجوك تطيق
يا ما طلبت مني أعيد حكي الحدوتة كتير
وفي كل مرة أعيدك قلبي كان بيطير
لما تلاقيني قدمت ومش مواكب عقل جيلك
ما تركنيش لجهلي، علمني من غير ما أجيلك
خليك عنيا نورلي طريقى لمنتهاه
وافتكر إني من علمك معنى الحياة
لما أبطل أمشي لوحدي خطوتين
لما أكون أضعف إني أشرب من غير معين
لما تموت الذاكرة وبالعافية أعرف إنت مين
وجودك جنبي كفاية لحد ما يجيلي اليقين
كلمتين هقولهم عندي أغلى من الياقوت
كنت معاك يوم ولادتك
عايزك جنبى يوم ما أموت
اقرأ أيضاً
عن أحمد مكي
مكي، مخرج وممثل ومغني راب، مصري الأب من أمٍّ جزائرية، تخرج في قسم الإخراج بمعهد السينما، وبدأ مسيرته الاحترافية بإخراج فيلم "الحاسة السابعة" عام 2003 للممثل أحمد الفيشاوي، ثم شارك في إخراج عددٍ من المسلسلات الشهيرة مثل: "لحظات حرجة" و"تامر وشوقية"، حيث مثل أيضاً دوراً صغيراً.
ثم انطلق بعد ذلك كممثل كوميدي له حضور بشخصيات اشتهرت مثل "هيثم دبور" في فيلم "مرجان أحمد مرجان" عام 2007، ثم في فيلم منفرد باسم "H دبور"، وأدوار البطولة في أفلام "طير إنت" عام 2009، "ولا تراجع ولا استسلام".
وبالإضافة للتمثيل والإخراج، يؤلف مكي أغاني الراب ويغنيها، وقد أطلق أول ألبوم في عام 2012 بعنوان "أصله عربي"، ومؤخراً أطلق أغنية "وقفة ناصية زمان"، و"آخرة الشقاوة" بمشاركة المغني الشعبي محمود الليثي.