أثارت تصريحات لزوج الممثلة المصرية نجلاء بدر محمد عفيفي جدلاً واسعاً على مواقع التواصل الاجتماعي بعدما صرح في مداخلة هاتفية مع الإعلامية إنجي القاضي في برنامج «مساء dmc» بأنه سيطلق زوجته إذا زاد وزنها.
وفي المداخلة الهاتفية، سألته الإعلامية التي استضافت نجلاء عن تقييمه لها كفنانة، فقال موجها الكلام لزوجته: «بحب فيكي إنك بتعملي تشكيلة أدوار كبيرة الفترة اللي فاتت، أدوار مختلفة ومفاجئة، أنا مش متخيل إمبارح كنت بتفرج عليكي لابسة بدلة، واحدة تخينة وعندها سمنة وصدقتك».
وسألت نجلاء بدر زوجها: «لو حصل كده في الحقيقة»، فأجاب: «هطلقك طبعا. أنا واخدك موديل معين، واخدك عربية سبور ولذيذة، تقلبي أتوبيس، هنزل المحطة الجاية على طول».
جدل بسبب تصريحات زوج نجلاء بدر
التصريح أثار جدلاً واسعاً على مواقع التواصل الاجتماعي، خاصة بين النساء، اللاتي اعتبرنه إهانة لزوجته كما أبدين اعتراضهن على تشبيه المرأة في العموم بمجرد سيارة وتقييمها على حسب شكلها.
المغردة المصرية سما علقت على تصريحات عفيفي قائلة:” بغض النظر عن سطحيتك في الكلام ونظرتك الدونيه للمرأة اللي بتقتصر علي الشكل وبس وإنك تشبه زوجتك بالعربية وهتقلب أتوبيس، بس هي الأخت #نجلاء_بدر سمعت رأيك كده وبيس يعني؟ تصريحك ده يأكد شخصيتك اللي سمحت ليها بفستان الجونة فعلاً محدش ينخدع في الـlifestyle بتاعكم ولا حريتكم المزعومة”.
أما المغرد محمد رضا فعلق قائلاً: “حصل لها تغييرات مثلاً تخنت أو خسِت، تعبت ولا مرضت ينفر منها وكأنها آلة مش بشر، عايز عودها مظبوط وشعرها لونه كذا وبشرتها درجة معينة ولو هي رفضته عشان شكله مش عاجبها يبدأ يقول عليها بتاعة مظاهر.. الإنسان عموماً لازم يكون متقبل شكل اللي قدامه تمام”.
أما علي فعلق ساخراً: “حلو موضوع أنا واخدك موديل معين ده اللي قاله جوز نجلاء بدر بعد كده لما الشباب تحب تفركش تبقي تقول للبنات شوفي يا بنت الناس، أنا واخدك موديل السنة، معلش والله الموديل الجديد نزل”.
نجلاء بدر تعلق على تصريحات زوجها
حالة الجدل التي تبعت تصريحات محمد عفيفي اضطرت الفنانة نجلاء للتعليق، إذ قالت إن زوجها كان يمازحها حين تحدث عن زيادة الوزن، وقالت نجلاء بدر في تصريحات لصحيفة المصري اليوم: تفاجأت بردود الأفعال من الجمهور ودفاعهم عني، ولكن حرام محمد جوزي كان بيهزر مش أكتر، وأنا عشان عارفة طبيعته وحافظة جوزي كويس جداً وعارفة إنه بيهزر.
وأضافت: “عمري ما تخيلت إن الموضوع هياخد الحجم ده، ودفاع الجمهور عني، وأكيد هم عندهم حق طبعاً، ولو مش بيهزر يبقى عندهم حق طبعاً، ومبسوطة جداً إن الجمهور بيدافع عني وبيدافع عن أي امرأة جوزها بيقولها كده إنه هيطلقها لو تخنت”.